Судот во Атина денеска го прогласи поранешниот грчки министер за одбрана Акис Цохаѕопулос за виновен за перење пари, по петмесечното судење во најголемиот корупциски скандал во Грција.
Цохаѕопулос, кој беше важна фигура во поранешната Влада на социјалистите, е прогласен за виновен заедно со уште 16 од вкупно 18-те негови соработници, кои беа обвинети во рамките на оваа афера. За виновни се прогласени и неговите сегашна и поранешна сопруга, како и ќерката.
Поранешниот министер, како и членовите на неговото семејство и соработниците, мина речиси една и пол година во притвор. Изрекувањето на пресудата се очекува утре.
Во април судот го осуди Цохаѕопулос (73) на осум години затвор поради поднесување лажни извештаи за имотот. Исто така, е наредено конфискување на неговата луксузна вила во центарот на Атина.
Тој е прогласен за виновен во случајот со корупција при набавка на воена опрема.