По 30 илјади месечно, или илјада домаќинства и дуќани на ден остануваат без струја во Грција, поради неплатени сметки кон Националната компанија за електрична енергија.
Весникот „Имерсија“ пишува дека според последните податоци, долгот кон компанијата за струја изнесува 1,1 милијарди евра. Се работи за неплатени суми поврзани со специјалниот данок за недвижен имот кој Грците го плаќаат заедно со сметките за струја.
Новиот данок го воведе Владата во рамките на мерките за строги економии со цел излез на земјата од должничката криза.
Данокот варира во зависност од употребата, големината и реонот каде што се наоѓа недвижноста. Тој требаше да изнесува максимум 10 проценти по метар квадратен, но под притисок на кредиторите беше зголемен на 16 проценти. Новиот данок се наплаќа заедно со сметките за струја и на оние кои не го плаќаат им се запира електричната енергија. На должниците им се дава рок да ги платат сметките за струја.