На 17 јуни Белград и Приштина ќе разменат само офицери за врска, кои нема да имаат никаков дипломатски статус, протокол или имунитет, и нема да стапат на должност врз основа на агремани, пишува белградскиот весник „Новости“.
– Приштина во петокот, во последниот круг од разговорите со Белград, се откажа од барањето да се отворат специјални кабинети, со екипи, според моделот на амбасади, за „Новости“ изјави српскиот офицер за врска Дејан Павичевиќ и додаде дека на тој начин целосно се создале условите тој да почне со работа во Приштина, а косовскиот претставник Лулзим Пеци во Белград.
-Ќе го имаме само задолжителното полициско обезбедување, што е наполно нормално заради специфичните односи меѓу Србите и Албанците, рече Павичечиќ.
Коментирајќи ја изјавата на косовскиот вицепремиер Едита Тахири дека во Белград ќе почне со работа „амбасадор на Република Косово“, Павичевиќ кажа дека „може да се нарече и англиска кралица, но тоа нема да е точно“.
Офицерите за врска нема да имаат никакви назначувања или дипломатски надлежности, какви што имаат амбасадодите, согласно Виенската конвенција.
Павичевиќ изјави дека главна задача на офицерите годинава ќе биде да го спроведуваат бриселскиот договор, постигнат од премиерите Ивица Дачиќ и Хашим Тачи.