Парламентарните избори во Црна Гора ќе се одржат на 14 октомври, одлучи денеска шефот на државата Филип Вујановиќ.
Тие ќе бидат деветти од воведувањето на повеќепартискиот систем во Црна Гора, односно трети по прогласувањето независност во 2006 година.
Според одлуката за распишување избори, рокот за доставување изборни листи за пратеници до Државната изборна комисија почнува од 20 август, а завршува на 19 септември.
Вујановиќ за 14 октомври распишал и локални избори во Никшиќ, Будва и Котор.
Членките на црногорската владејачка опозиција Демократската партија на социјалистите (ДПС) и Социјалдемократската партија (СДП) повторно заедно ќе настапат на парламентарните избори. На тој начин владејачката коалиција во Црна Гора ќе го продолжи „политичкиот брак“, кој трае веќе 14 години.
Од друга страна, и понатаму е отворено прашањето за опозицискиот настап на изборите, бидејќи најсилната опозициска партија Социјалистичката народна партија (СНП) се уште не донела конечна одлука.