Словенечкиот претседател Борут Пахор предупреди денеска дека социјалните проблеми не смееат ниту во време на економска криза да доведат до политичка радикализација.
– Потребно е да се осуди распалувањето на политичките страсти и радикализмот од сите видови. На тие појави треба да им се посвети внимание токму сега, кога луѓето на кои им е најтешко можат да добијат чувство дека немаат што да загубат и со тоа да станат лесен плен на оние подбуцнувачи, кои шират говор на омраза и нетолеранција, истакна Пахор на комеморацијата во Осанкарици, со која беше одбележана 70-годишнината од убиството на борците од партизанскиот Похорски баталјон.
Говорејќи пред неколку илјади собрани граѓани, Пахор истакна дека сегашните генерации на политичари во Словенија и во другите европски држави имаат историска одговорност големите проблеми со кои луѓето се соочуваат во криза да ги решат во духот на искрен дијалог со оние кои размислуваат поинаку.
– Историјата е полна со докази како во заострени прилики од мали несогласувања може да се развие непријателство, кое завршува со солзи и бескрајни човечки трагедии, додаде Пахор.