Најмалата партија во 47. Народно собрание на Бугарија „Преродба“ ќе поднесе жалба до обвинителството против поранешниот вицепремиер и министер за одбрана Красимир Каракачанов и други функционери поради договорот за ловци Ф-16, изјави на брифинг партискиот пратеник Николај Дренчев.
Како што јави дописникот на МИА од Софија, Дренчев коментира дека по прегледувањето на договорите од зделката, кои биле класифицирани на чуден начин, дошол до заклучок дека во Бугарија имало злоупотреба на јавните средства. Според него, потпишаните документи му овозможиле на добавувачот еднострано да не го испорача тоа што го потпишала Бугарија и еднострано да ја смета цената за различна и последователно да бара повеќе пари. Според него, договорот за набавка на борбени авиони од САД бил „мачка во вреќа“.
Локалните медиуми во Софија потсетуваат дека во 2019 година третата влада на поранешниот премиер на Бугарија Бојко Борисов купи 8 авиони Ф-16 од САД во вредност од 600 милиони евра, а истата година Народното собрание ги ратификуваше договорите за авионите, потпишани од министерот за одбрана Красимир Каракачанов.
Извор: МИА