Најголема должност на Србија е да спречи воспоставување граници со Косово. Тоа е најважната точка која ќе ја определи судбината на земјата, изјави лидерот на ДСС и поранешен српски премиер Војислав Коштуница, додавајќи дека преговорите со Приштина треба да се вратат под мандат на Советот за безбедност на ОН, согласно резолуцијата 1244.
– Силно се залагам Србија да испрати барање до СБ на ОН за прекин на преговорите под надзор на Брисел, а дијалогот да се врати под целосен мандат на Советот за безбедност, бидејќи така е одредено и со Резолуцијата 1244, нагласи Коштуница.
Оценувајќи дека границата „во секој случај е прашање над сите прашања“, Коштуница истакна дека доколку власта воспостави граница со Косово, тогаш веќе не е потребна никаква платформа, јави Танјуг.
Што се однесува до одлуката на Хашкиот трибунал да го ослободи Рамуш Харадинај, Коштуница одговори дека „на дело е сеопфатен и осмислен напад на западните сили врз Србија“.
Тој додаде дека „овој напад врз Србија се прикрива врз наводните добивки кои ги носат евроинтеграциите и доколку државата и целото општество не пронајдат вистински одговор на оваа опасност, ни се заканува тежок национален и државен пораз“.