Посетата на албанскиот премиер Еди Рама на Србија би била добродојдена и покрај неодамнешните инциденти на фудбалскиот натпревар во Белград, изјави денеска во Брисел Маја Коцијанчич, портпаролка на високата претставничка на ЕУ за надворешна политика и безбедност Кетрин Ештон.
– Сметаме дека посетата на Рама на Србија би била добродојдена за продолжување на процесот за помирување и унапредување на соработката во регионот, рече Коцијанчич.
Таа не сакаше да ги коментара наводите на медиумите дека од Брисел се врши притисок врз Белград и Тирана, и покрај размената на тешки зборови по инцидентот, посетата, сепак, да се реализира.
– Нашиот став е јасен: до посета треба да дојде, бидејќи таа ќе биде во интерес на сите и во согласност со обрските кои Србија и Албанија ги презедоа како земји кандидати за членство, изјави Коцијанчич.
На упорните инсистирања на новинарите од Косово и од Албанија, Европската комисија да го осуди „шовинистичкото скандирање на српските навивачи“ од трибините во Белград и наводното малтретирање на албанската делегација, Коцијанчич изјави дека останува при вчерашната изјава дека на спортските трибини нема место за политиката и дека српските власти во текот на натпреварот се однесувалепрофесионално, пренесе Танјуг.
Портпаролот на еврокомесарот за образование, младина и култура Денис Абот, пак изјави дека истрагата за тоа кој е одговорен за инцидентите на натпреварот треба да ја спроведе УЕФА, со која Европската комисија има договор за соработка.
– Не е наша работа да делиме црвени картони и да пресудуваме кој на кого треба да му се извини, а на натпреварот во Белград никој не се прослави со своето однесување, рече тој.
Абот укажа дека проблемот со расизмот, шовинизмот и насилството, за жал, е присутен на многу спортски манифестации и дека тој не може да се реши преку ноќ.