Американскиот државен секретар Хилари Клинтон денеска порача дека Вашингтон ќе продолжи да ја поддржува Црна Гора на патот кон полноправно членство во ЕУ и НАТО.
Како што соопшти црногорската Влада, Клинтон во честитката до премиерот Игор Лукшиќ, по повод отворањето на пристапните преговори со ЕУ, истакнува дека тоа е уште една потврда на резултатот кој Црна Гора го има постигнато од прогласувањето независност во 2006 година.
– САД се придружуваат во прославата на овој важен чекор на патот кон остварување на стратешката цел на Црна Гора, наведува Клинтон.
Таа укажа дека продолжувањето на европскиот пат нема да биде лесно и дека треба да се спроведуваат реформите и понатаму, посебно во областа на владеењето на правото.