Пред 20 години повеќе од осум илјади мажи и деца беа убиени во геноцид, а тој страшен факт конечно го поттикна сите членки на НАТО да и дадат поддршка на Америка да го направи тоа што беше сосема неопходно за да започнат мировните преговори и Босна и Херцеговина (БиХ) повторно да зачекори на патот кон нормалниот живот, изјавил во саботата поранешниот американски претседател Бил Клинтон на комеморацијата по повод 20-годишнината од геноцидот во Сребреница.
„Благодарен сум на луѓето кои работеа на тоа војната да прекина, да сопре убивањето и на сите луѓе кои работеа на тоа да се изгради мир“, рекол Клинтон, додавајќи дека 20 години подоцна е благодарен поради тоа што БиХ и натаму е мирна земја, дека е блиску до членство во ЕУ и дека е учесник во мировните трупи во Авганистан и на други места.
Клинтон истакнал дека во името на својата земја и длабоко од своето срце, го сака ова место и дека не сака повеќе да види ништо слично нити на илјадници километри подалеку.
„Но светот сеуште е доминиран од војни, убивања засновани на етничка припадност, раса, вера. Сите во светот се обидуваат да одлучат дали навистина можеме да живееме заедно, но некој мора да го направи првиот чекор“, заклучил Клинтон.