Премиерот на Хрватска, Зоран Милановиќ најави дека натписите во Вуковар, на кирилица и српски јазик ќе бидат поставени по вторниот круг на локалните избори, во јуни годинава.
-Не сакам темата да ја интоксира кампањата, изборите нека завршат во мир, а потоа ќе се спроведе законот. Кирилицата е наш, хрватски јазик, половина средновековни документи се напишани на неа – изјави Милановиќ.
Тој додаде дека многумина се обидуваат да го злоупотребат воведувањето на двојазичноста и порача дека ќе се спроведе Уставниот закон.
-Оние кои навистина имаат болка во срцето, со нив сочувствувам и ги разбирам. Има во нашите редови од оние кои беа во логорите во Србија, министри и градоначалникот на Вуковар, кој ги обедини Србите и Хрватите и кој поради тоа ќе ги добие изборите – нагласи тој.
И покрај противењето на одредени здруженија на воени ветерани и десничарски партии, владата повеќе пати порача дека државата нема да ја одложува примената на Уставниот закон за правата на националните малцинства, кој овозможува примена на двојазичноста во Вуковар.
Елена Георгиевска