Кинеската компанија „Mint Group“, која веќе неколку години работи во Србија, најави дека во земјата ќе донесе нови технологии поврзани со роботика и вештачка интелигенција.
Од компанијата велат дека во соработка со технолошката фирма „AGIBOT“ развиваат повеќе видови роботи, меѓу кои и хуманоидни роботи, роботски кучиња и системи што можат да помагаат во секојдневните домашни работи.
Според најавите, Србија би можела да стане еден од центрите за развој и производство на ваква технологија во Европа. Во план е проширување на бизнисот и отворање нови капацитети во повеќе градови.
Од „Mint Group“ посочуваат дека добрата деловна клима и досегашното искуство во Србија биле клучни за новите инвестиции. Компанијата веќе има фабрики во Шабац и Лозница, каде произведува делови за автомобилската индустрија.
Српскиот претседател Александар Вучиќ претходно најави дека во Шабац наскоро би можела да биде отворена фабрика за хуманоидни роботи, а првите роботи произведени во Србија се очекуваат веќе оваа година.
Кинеската компанија „AGIBOT Innovation“ важи за една од најбрзо растечките компании во областа на роботиката и вештачката интелигенција, а нивната технологија веќе се користи во индустријата и во секојдневниот живот.