Според известувачот на Европскиот парламент за Србија Јелко Кацин, промена на границите и поделба на Косово ниту на еден начин не доаѓаат предвид, бидејќи тоа е неприфатливо, како и дека треба да се најде прифатливо и трајно решение за косовското прашање.
„ Белград добро знае, не само од Европската комисија, туку и од некои земји-членки, дека промена на границите и поделба на Косово не доаѓаат предвид. Ниту во случај на размена на територии, која често ја спомнува српскиот премиер. Тое е неприфатливо, а Белград и Приштина бараат и заслужуваат прифатливо и трајно решение“, рече Кацин за радио „Дојче веле“.
Кацин рече дека вистински политички дијалог меѓу Белград и Приштина немало во последните 30 години.
Кацин смета дека колку побрзо биде остварена директна средба на ниво на двете влади, со присуство на високиот претставник на ЕУ за надворешна политика и безбедност Кетрин Ештон, ќе биде подобро за политичката атмосфера, клима и напредок во дијалогот.
„ Кое поглавје и да го отвори Србија, секогаш излегува Косово. На пример поглавјето за енергетика – енергетските басени, преносните мрежи, наплатата, се тоа е поврзано и со Косово“, рече Кацин.