Низ цела Грција, земјоделците продолжуваат да ги блокираат патиштата со илјадници трактори, кои се оставени отворени во барем една лента, а клучните одлуки за продолжување на протестите ќе бидат донесени овој викенд, објавува денес „Катимерини“.
Земјоделците истакнуваат дека „не добиле никакви конкретни гаранции од владата“ дека нивните барања ќе бидат исполнети, поради што сè уште се на барикадите.
Според земјоделците, околу 3.000 трактори се паркирани на автопатот Е65, но сообраќајот не е нарушен, бидејќи една или две ленти се оставени отворени за сообраќај на сите национални патишта, што овозможува непречено движење за време на божиќните празници, кои во Грција се слават според грегоријанскиот календар.
Како што е најавено, земјоделците ќе донесат одлука за продолжување на протестот утре во 12 часот, на блокада во близина на Никаја.
„Овој состанок е претходник на националниот состанок што се очекува до недела“, рекоа земјоделците, нагласувајќи дека состанокот ќе одлучи дали и како да се интензивираат блокадите.
Никеја се смета за „барометар“ на земјоделските блокади, бидејќи е најголема во земјата и собира најмногу луѓе. Грчката влада истакна дека од 27-те барања што ги поставија земјоделците, „16 се решени, четири се разгледуваат, додека седум не можат да се исполнат“, но земјоделците инсистираат дека се потребни „конкретни одговори“ и значаен дијалог со владата.
Земјоделците во Грција протестираат против доцнењата во исплатата на субвенциите од ЕУ, надоместоците што им ги должи државата, реструктуирањето на долгот, купувањето гориво без данок и пакет мерки за решавање на тешките околности со кои се соочија оваа година.