Грчките власти стравуваат од можна експлозија во запалениот ферибот „Норман Атлантик“, за ТАСС изјави почесниот руски конзул на островот Крф и другите острови во Јонско Море, Никос Канулас.
-Пожарот е многу сериозен. Огнот се шири од долу, од најниските палуби, каде се наоѓаат автомобилите. Таму, освен лесни возила има и многу камиони, меѓу кои и три цистерни со нафта. Генерално, има многу запалливи материјали, изјави Канулас.
Грчките спасувачи се обидуваат да не дојде до експлозија. Офицери на локалната военопоморска база ми кажаа дека огнот е многу силен и дека дури и металот се топи, додаде конзулот.
Канулас информира дека патниците на фериботот се главно Грци, Италијанци и Французи.
Контролата за спроведување на операцијата и е предадена на италијанската страна, затоа што неупотребливиот ферибот влегол во италијански територијални води.