Грчката полиција за три месеци од оваа година на границата со Албанија заплени речиси 4,5 тони марихуана, објави денеска албанскиот весник „Шекули“.
Во поголемиот број случаи, додава весникот, станува збор за соработка на албанските и грчките шверцери, која се оценува како мошне успешна.
Претседателот на Федерацијата на епирските полицајци, Јоргос Папацимпас изјави дека Епирската полиција има реални причини за загриженост, бидејќи шверцот на марихуана тече со вообичаениот ритам како и минатата година и не покажува знаци на намалување.
– Со загриженост констатираме дека шверцот на марихуана и на останатите наркотични средства од двете страни на границата е ист како и минатата година и не се намалува. Последните месеци е запленета голема количина марихуана, претежно од албанските шверцери, но не заостануваат многу ниту грчките, кои им се поддршка на наша територија, додаде Папацимпас.
Албанската полиција минатата година заплени над 12 тони марихуана, наменета за грчкиот пазар.