Српското обвинителство за високотехнолошки криминал (ВТК) го започна вториот дел од меѓународната акција Infinity во врска со финансиски измами на интернет, а досега се уапсени 16 осомничени за компјутерска измама, соопштено е во средата во Белград.
Во првиот дел од акцијата, спроведена во јануари, при претрес на повеќе локации се добиени значајни податоци и докази, при што со анализа на тие податоци е утврдено основано сомнение дека вработени во најмалку две фирми во изминатите неколку години оштетиле повеќе од 127.000 граѓани на други земји во вкупен износ кој надминува седум милијарди долари, соопшти ВТК во соопштението за медиумите, додавајќи дека износот се уште се утврдува.
Уапсените во вториот дел од акцијата се обвинети дека измамиле најмалку 200 странски државјани во вкупен износ кој надминува 20 милиони американски долари повикувајќи се на измамнички финансиски трансакции на Интернет.
Акцијата е иницирана со Европравда, Агенцијата на Европската унија за соработка во кривичната правда и командата на Федералната полиција на Австралија, а Специјалното обвинителство на Србија наведува дека се претресени 16 локации во Белград и низ Србија.
Покрај 16 апсења за компјутерска измама, перење пари и криминален заговор, досега се запленети повеќе од 130.000 евра во готовина, неколку сметки на криптовалути и неколку автомобили, а во тек се и имотни проверки.
Специјалното обвинителство за високотехнолошки криминал ги предупреди граѓаните на Србија и странските државјани кои живеат и работат во Србија да бидат особено внимателни кога нудат вработување во кол центри кои наводно ги едуцираат и советуваат клиентите на кој било финансиски пазар, вклучително и тргување со криптовалути.
Ваквите активности се строго регулирани со Законот за пазар на капитал и активностите на Комисијата за хартии од вредност, која ги издава потребните дозволи.