Грчките пожарникари денеска се борат со шумски пожар јужно од Атина, а силниот ветер ги отежнува нивните напори. Битката со огнената стихија следела само неколку часа откако успеале да спречат пожарот да се прошири во планинската област исто така во близина на главниот град.
Десетици пожарникари, поддржани од 17 авиони, се борат да го локализираат новиот пожар што избувна во ретко населена област во близина на градот Кератеа, на околу 35 километри јужно од Атина.
Грчката телевизија прикажа најмалку една куќа во пламен и чад што се издигнува над запалените борови шуми и маслинови градини, додека грчките медиуми објавија дека пожарот зафатил најмалку пет куќи.
Во текот на викендот низ Грција избувнаа десетици шумски пожари, потпомогнати од силните ветрови.