Грција денес е во 24-часовен генерален штрајк, објавен од двете најголеми синдикални конфедерации, GSEE и ADEDY, во знак на протест против новиот закон за работни односи.
Вработените во јавниот сектор, образованието и транспортот, како и таксистите, учествуваат во штрајкот, објави „Катимерини“.
Метрото и трамвајот во Атина ќе работат ограничено од 9 до 17 часот, додека автобусите и тролејбусите ќе работат со прекини.
Железничкиот и приградскиот сообраќај се целосно прекинати, додека летовите не се засегнати откако судот пресуди дека учеството на контролорите на летање во штрајкот е нелегално.
Централни протестни собири ќе се одржат во Атина, на плоштадот Клафтмонос, во 11 часот, како и во други поголеми градови низ земјата.
Синдикатите бараат повлекување на предлогот за продолжување на работниот ден, враќање на 13-тата и 14-тата плата, колективни договори и намалување на работната недела на 35 часа.