Грција уште еднаш ќе биде во потполност парализирана. Денеска ќе се одржи генерален штрајк во знак на протест против мерките за штедење, кој го закажаа двата најголеми синдикати. Во Атина се стравува од нереди.

Планиран е марш во центарот на Атина, но се подготвуваат и протести ширум земјата.

Меѓу останатите, штрајк за денеска најавија јавните службеници, адвокатите, судиите, нотарите, лекарите во болниците, стоматолозите, просветните работници, таксистите, возачите на траект.

Вработените во Грчката железница (ОСЕ) исто така учествуваат во утрешниот штрајк што значи дека со метро нема да може да се оди до атинскиот меѓународен аеродром. ОСЕ оперира со метро линијата од станицата Дукисис Плакентиас до аеродромот.

Возачите на тролејбусите исто така штрајкуваат, а возачите на автобусите нема да возат пред девет часот и после 21. Таксистите во четврток нема да работат од осум до 17 часот.

Со денешниот штрајк ќе биде погоден и воздушниот сообраќај затоа што контролорите на летање нема да работат од 10 до 13 часот.

Патничките фериботи денеска исто така нема да пловат, затоа што нивниот синдикат ПНО бара фериботските компании да потпишат нов колективен договор со вработените. Она што е необично за денешниот штрајк е тоа што кон него ќе се приклучат и сопствениците на трафики што досега не било пракса.

Ова е втор генерален штрајк овој месец.