Од утрово густ, влажен и тежок снег паѓа во поголем дел на БиХ, снег има и на повисоките делови на Хрватска, како што е прогнозирано, ќе паѓа и на северот на Црна Гора, во планинските предели.
Во БиХ под снег осамнаа многу градови – Сараево, Добој, Модрич, Босански Брод, Оџак, Орашје, Брчко, Градач, Грачаница, Тузла и Сребреник.
„Дневни аваз“ објави дека стеблата се виткаат под тежок, влажен снег, па постои опасност од кршење на гранките, а сообраќајот во БиХ се одвива отежнато.
И во Хрватска снегот продолжи да паѓа, како и во претходните денови, во Лика и на Биоково, на делот на приморјето има бура па сообраќајот на одделни патни правци е затворен за одредени видови возила, а во поморскиот сообраќај во прекин се повеќе траектни линии.
На Биоково е забележана снежна бура, а во подножјето, во Макарска, т.н. „мрачна бура“ која дува со брзина од педесетина, со удари и до 70 километри на час.
Во Црна Гора, каде снег падна на северот на земјата уште пред два дена, и денеска во тие предели прогнозираат снег, соопштено е од тамошниот Завод за хидрометеорологија и сеизмологија.
