Еврокомесарот за проширување Штефан Филе, во рамки на својата дводневна посета на Белград, ја посети Канцеларијата за евроинтеграции на српската Влада.
Тој и посака успех на Србија, која влегува во нова одлучувачка фаза во односите со ЕУ, откако Европскиот совет на 28 јуни одлучи да отвори преговори за пристапување со Србија. Филе особено изрази желба да дојде во Кацеларијата за, како што рече, на сите вработени лично да им честита за работата што досега ја сработиле.
– Вашата Канцеларија секогаш била во првите редови во текот на сите клучни предизвици кои Србија ги имала и ги има на патот кон Европа. Во периодот на чести избори и многу промени на Владата, Канцеларијата претставуваше компас за целата српска администрација и смирено продолжуваше да работи без оглед на околностите, кога времињата беа добри, но и кога беа тешки, рече Филе.
Филе особено се осврна на фактот дека Спогодбата за стабилизација и асоцијација конечно ќе стапи во сила во септември, што е едно големо достигнување за Србија.