Влијателни функционери на ПАСОК се разидуваат во ставот дали партијата да остане во коалиција со Нова демократија или да се преориентира во насока на учество на социјалистите во евентуалната идна влада на радикалната левица СИРИЗА, пишува во денешниот коментар весникот „Етнос“.
Една недела по евроизборите, на кои ПАСОК, помалиот коалициски партнер во кабинетот на премиерот Андонис Самарас, доби осум отсто од гласовите, поранешниот министер Костат Скандалидис во својата статија во весникот „Та неа“ вели дека партијата треба да стави крај на компромисот со десницата.
– ПАСОК треба конечно да стави крај на историскиот компромис со десницата на следните избори, за да почне да комуницира со сите сили од политичката сцена, во таа смисла и со проевропските сили на СИРИЗА, вели Скандалидис.
Тој денеска преку радиото Скај директно го постави прашањето за отстранување на Евангелос Венизелос од лидерската функција во ПАСОК, доколку конгресот на партијата одлучи да ја промени политиката, а Венизелос одбие да ја реализира.
Друг поранешен министер на социјалистите, Димитрис Репас исто така излезе со статија, во која ја повика ПАСОК да биде отворена кон евентуална перспектива за консолидација и за формирање на кабинет со радикалната левица СИРИЗА, доколку тоа го бараат околностите.