ЕУ „мора да ја прими Турција“ како своја членка, доколку тврди дека е против исламофобија, изјави денеска во Џибути турскиот претседател Реџеп Тајип Ердоган.
Ердоган, кој е прв турски претседател кој го посетил Џибути, истакна дека „Турција никогаш нема да толерира терористи без разлика на која вера и припаѓаат“, а потоа се осврна на евроитеграцискиот процес на Турција.
– Не е важно дали тие не прифаќаат или не. Ние ќе продолжиме со својата работа. Ние ја тестираме Европа. Дали Европа ќе може да проголта и да ја прифати Турција, чиј народ се муслимани? Доколку сте против исламофобија, тогаш морате да ја примите Турција во Унијата, порача турскиот претседател.
Тој смета дека тезата со која се тврди дека ЕУ е „христијански клуб“, ќе биде оправдана доколку Турција се одбие за членство.
– Турција е вклучена во НАТО, ОБСЕ… И зошто не ја прифаќате во ЕУ? Значи проблемот се наоѓа на друго место, нагласи Ердоган, додавајќи дека неговата земја „е сега силна и нема да дојде на вратата на ЕУ за да моли“.
– Доколку Турција биде прифатена, ќе биде членка. Ако ја одбијат, тогаш таа ќе создаде свој пат, заклучи Ердоган.