Двата најголеми синдиката во Грција – на вработените во приватниот (ГСЕЕ) и во државниот сектор (АДЕДЕ), повикаа утре на 24 часовен генерален штрајк против затворањето на државната радио и телевизија ЕРТ, објавија грчките медиуми.
И вработените во грчката државна радио и телевизија ЕРТ повикаа денеска за протести пред зградата на медиумот во Атина.
– Ги покануваме сите на митинг пред зградата на радиото и телевизијата, бидејќи борбата против отпуштањето од работа и невработеноста треба да биде заедничка, се вели во пораката на вработените во ЕРТ на Фејсбук.
Штрајк е закажан денеска и во приватни радио-телевизискаи канали и во националната агенција АНА-МПА.
Унијата на новинари од Атина соопшти дека „по непријателското и варварско вмешување на трипартиската Влада да ја затвори ЕРТ, новинарските сојузи одлучиле да почнат со непрекинати акции со штрајк во сите приватни радио-телевизиски канали“.
Демонстрантите тврдат дека одлуката за затворање на државната радио и телевизија била донесена лично од премиерот Андонис Самарас. Од утре штрајк почнуваат и вработените во сите весници во Грција.