Седумгодишната Патриција, која ја преживеа тешката сообраќајна несреќа на Халкидики во Грција на 15 јули, конечно се опоравува и заминува дома во Молдавија.
Во несреќата ги загуби своите родители и шестмесечниот брат. Мајката и бебето загинаа на местото на несреќата, додека таткото им подлегна на повредите подоцна истата вечер во болница.
Патриција повеќе од еден месец се лекуваше во болница во Солун. По несреќата најпрво беше згрижена во болницата во Полигирос, но поради сериозноста на повредите беше итно префрлена во Солун.
Таа имаше две операции и претрпе тешки повреди на градниот кош и долниот дел од бутната коска. Во првите денови беше приклучена на апарат за механичка вентилација, но подоцна лекарите успеаја да ја исклучат од апаратот и нејзината состојба значително се подобри.
youtube.com/watch?v=pQtCBWCSbLE&source_ve_path=MjM4NTE&embeds_referring_euri=https%3A%2F%2Fmondo.rs%2F
Сега Патриција се враќа во Молдавија со својата тетка, сестрата на нејзината почината мајка, која го презеде старателството над неа.
До Молдавија ќе патува со специјално возило, во придружба на тетката и четворица здравствени работници. Целиот тим што се грижеше за неа во Солун внимателно го следеше нејзиното закрепнување.
Тетката во меѓувреме накратко отпатува во Молдавија за погребот на членовите на семејството, а потоа веднаш се врати во Грција за да биде со Патриција.
Несреќата се случи при директен судир меѓу автомобилот во кој беше семејството и цистерна. Возачот на цистерната помина со полесни повреди и беше приведен, но подоцна беше пуштен да се брани од слобода.
Патриција е единствениот преживеан член на семејството. По повеќе од еден месец во болница, сега конечно се враќа во Молдавија, каде што ќе продолжи со опоравувањето под грижа на својата тетка.