Српскиот премиер и министер за внатрешни работи Ивица Дачиќ денеска се заложи за нормализирање на односите со Хрватска, истакнувајќи дека досега другата страна не покажала голем интерес за тоа.
– Овој дијалог го барам веќе неколку месеци, предлагам но одговор нема. Едноставно изгледа дека не се премногу заинтересирани, а ако тие не се тогаш не сум ниту јас, изјави Дачиќ за телевизијата Б92.
Тој смета дека „треба да се стопи мразот“ и да се најде решение за еден вид нормализирање на односите со Хрватска.
Српскиот премиер нагласи и дека косовскиот премиер Хашим Тачи бил на претпоследниот состанок во Брисел со хрватскиот премиер Зоран Милановиќ, кој се понудил да посредува во дијалогот меѓу Тачи и Дачиќ.
– А кој ќе посредува во дијалогот меѓу мене и Милановиќ?, прашал Дачиќ по разговорот со американскиот заменик државен секретар Филип Рикер.