Српскиот премиер Ивица Дачиќ изјави денеска дека никој не сака да воспостави граница меѓу Србија и Косово, туку да се најде практично решение врз основа на Резолуцијата на Собранието на Србија, јави Танјуг.
– Никој не сака да воспоставува каква било граница, туку да се најде практично решение врз основа на платформата и резолуцијата усвоена во Собранието на Србија. Не гледам друго решение. Ако некој знае некое поефикасно решение, нека го предложи, рече Дачиќ на заедничка прес-конференција со претседателот на Кипар Димитрис Христофиас, кој е во посета на Белград.
Тој, коментирајќи го денешниот митинг на северот на Косово, каде Србите повикаа да се отфрлат сите договори постигнати во дијалогот Белград и Приштина и да се прекинат преговорите, истакна дека „Собранието на Србија усвоило резолуција во која јасно стои дека Србија ќе ги почитува сите досега постигнати договори од дијалогот и оти дијалогот мора да продолжи како и тоа дека не постои друг начин за решение на проблемот“.
Дачиќ им порача на Србите од северот на Косово дека дијалогот е единствен начин да се решат проблемите во Косово.
На митингот во северниот дел на Косовска Митровица, чии организатори се претставници на локалната самоуправа на северот на Косово, прочитана е Декларација со која се отфрлуваат сите постигнати договори во дијалогот Белград-Приштина со посредство на ЕУ и се бара прекин на натамошните преговори и практиката да се прифаќаат, како што сметаат, наметнати и штетни договори.
Во Декларацијата од Уставниот суд се бата без одложување да се донесе одлука за уставноста и законитоста на договорите од Брисел, како и уредба на Владата за нивна примена.