Премиерите на Србија и Косово, Ивица Дачиќ и Хашим Тачи, синоќа во Брисел постигнаа договор за спроведување на Спогодбата за премините, пренесоа белградските медиуми.
Како што пренесува Радио-телевизија Србија (РТС), Дачиќ по средбата со Тачи, а со посредство на високата претставничка на ЕУ за надворешна политика и безбедност, Кетрин Ештон, изјави дека од Нова година меѓу Србија и Косово ќе бидат пуштени во употреба четири премини, по истиот режим што на северот на Косово беше спроведуван и досега.
На средбата во Брисел, што заврши ноќеска околу полноќ, претседателите на Владите на Србија и на Косово, и претставничката на ЕУ, разговараа за примена на Спогодбата за интегрирано управување со премините, чија реализација треба да почне во понеделник, на 10 декември.
Ештон прво имаше одвоени средби со Дачиќ и Тачи, а потоа беше оддржан и тројниот состанок.
Истакнувајќи дека посебниот статус за Србите од северот на Косово бил условот на Владата на Србија за почнување на примената на договорот за премините, Дачиќ изјави дека како и до сега, за Србите од северот на Косово нема да биде потребно да вадат документи и регистерски таблички од Косово и дека нема да им се наплатува царина.