Министерството за надворешни работи (МНР) на Црна Гора остро го осуди третманот на надлежните органи на Република Србија кон црногорскиот режисер Данило Маруновиќ, кој беше приведен на сослушување без претходна најава, а потоа му беше наредено да ја напушти територијата на Србија.
Како што е наведено во соопштението на црногорското МНР, Амбасадата на Црна Гора во Белград, веднаш по дознавањето за овој инцидент, го контактираше Министерството за надворешни работи на Република Србија и побара итно објаснување за сите околности под кои е извршен „овој неприфатлив третман кон црногорски државјанин и истакната културна личност“.
Тие исто така наведуваат дека таквиот третман кон црногорски уметник, во пресрет на закажан јавен културен настан, претставува грубо кршење на основните принципи на меѓународната соработка и културната размена.
„Таквиот чин е неприфатлив и го нарушува духот на добрососедските односи. Министерството за надворешни работи на Црна Гора бара итно и детално објаснување на оваа постапка од институциите на Република Србија и очекува сите околности да бидат разјаснети што е можно поскоро и да бидат преземени соодветни чекори за да се спречи повторување на слични инциденти“, соопшти црногорското МНР.
Црногорскиот режисер Данило Маруновиќ беше приведен на сослушување во просториите на српската безбедносна агенција БИА во Белград.
Како што објавија медиумите во Подгорица, агенти на БИА влегле во хотелската соба на Маруновиќ, каде што престојувал по повод вчерашното гостување на претставата „Господа Глембајеви“, во продукција на Црногорскиот народен театар, во Народниот театар во Белград.
По сослушувањето, на Маруновиќ му е наредено да ја напушти Србија. Порталот од Подгорица „Аналитика“ објави дека причината за акцијата на БИА против режисерот Маруновиќ била неговата колумна „На Видовден против Вучиќ“, која беше објавена во среда на тој портал, за кој Маруновиќ е колумнист.
Во соопштение за медиумите, црногорското Министерство за култура и медиуми изјави дека ставовите на Маруновиќ се можна причина за третманот на српските државни власти кон Маруновиќ.
„Имајќи предвид дека третманот на г-дин Маруновиќ можел да биде мотивиран од неговата јавна активност и изразување на ставови, ве потсетуваме на фундаменталната важност на слободата на мислата и изразувањето како универзални демократски вредности што ја формираат основата на секоја модерна и одговорна држава“, се вели во соопштението на црногорското Министерство за култура и медиуми.