Невообичаен случај, каков што најчесто има само на филм, ги вознемири жителите на српскиот град Сремски Карловци и особено семејството Станков – жител на градот, за кој најблиските верувале дека е мртов, се појавил жив само еден ден откако му правеле погреб, пишуваат српските медиуми.
Според пишувањата на локалните медиуми, 56-годишниот човек по име Саша Станков, кој за да бидат работите уште почудни, имал прекар Исус поради долгата брада, не бил во добри односи со семејството и живеел во Нови Сад, а минатата недела на неговите роднини им било кажано дека тој починал.
Телото било испратено во неговото родно место во запечатен лимен сандак, па не можело да се потврди дека тоа е членот на нивното семејство. Закопот бил извршен во петокот, а на крстот било напишано името на Станков.
Но, само ден подоцна, до членовите на семејството стигнала неверојатна информација од пријателка на Саша: нивниот роднина бил виден во Нови Сад, жив и здрав. Набргу била откриена забуната – во гробот со името на „воскреснатиот“ лежел негов починат сограѓанин, кој исто така се викал Саша и според семејството, дури и физички наликувал на Станков. Проблемот веројатно настанал на релација меѓу локалните полицајци, кои усно им потврдиле на роднините дека починал Саша Станков, без да ги извршат потребните проверки и Јавното комунално претпријатие од Сремски Карловци, кое е одговорно за гробиштата и погребувањето.
„Воскреснатиот“ човек повеќе од една година живеел во Нови Сад и неговото семејство немало никаков контакт со него. Кога го нашле, тој бил одведен во полициската управа на Нови Сад, каде е фотографиран и земени му се отпечатоци од прстите.
Во ноќта меѓу саботата и неделата е извршена ексхумација и телото на погрешниот покојник е извадено од семејната гробница на Станкови. Од семејството велат дека сѐ уште не добиле официјална верзија од надлежните за тоа како дошло до забуна од толкави размери.