Турскиот министер за надворешни работи Мевлут Чавушоглу денеска во Никозија ќе разговара со лидерот на кипарските Турци и други официјални претставници на Турската Република Северен Кипар, што е призната само од Анкара.
Чавушоглу денеска ќе разговара со претседателот на т.н. ТРСК, Ерсин Татар, за кипарското прашање и темата за Источниот Медитеран.
Чавушоглу пристигна во Никозија во саботата, каде што на аеродромот го пречекаа министрите за внатрешни работи и за надворешни работи на кипарските Турци, Зија Озтурклер и Тахсин Ертугрулоглу.
„Ние ќе продолжиме да ја браниме нашата национална кауза. Ние сме во ТРСК за да ги браниме правата и на Турција и на кипарските Турци“, напиша турскиот министер во објавата на социјалните мрежи по повод посетата.
Извор: МИА