Бугарскиот претседател Румен Радев свика состанок на Консултативниот совет за национална безбедност поради закани за националната безбедност и состојбата на вооружените сили.
Како што јави дописникот на МИА од Софија, на Советот ќе присуствуваат парламентарните партии и клучни владини претставници, а темата се ризиците и заканите по националната безбедност на Бугарија и состојбата на вооружените сили, како и неопходните мерки.
Предвидено е да има посебен извештај на началникот на бугарската армија, адмирал Емил Ефтимов.
Бугарските медиуми потсетуваат дека Консултативниот совет за национална безбедност се одржува по изјавата на министерот за одбрана, Стефан Јанев, дека акумулацијата на руски војници на границата со Украина ја загрозува бугарската национална безбедност.
Извор: МИА