Познатиот глумец Бата Живојиновиќ, успешно закрепнува во болницата „Свети Сава“, после тешкиот мозочен удар, кој го доживеа во вторникот, напишаа вечерва „Вечерње новости“.
Тој е вон животна опасност, а според прогнозите , лекарите очекуваат натамошно подобрување.
Лекарите велат дека на глумецот, пред два дена му пукнал крвен сад во мозокот, кој потоа предизвика мозочен удар.
„Сите сме оптимисти, но Бата е ненадминлив. Добро е расположен и се шегува“, изјави домашен пријател на Бата Живојиновиќ.
На посета беа глумците Драган Николиќ и Драган Белогрлиќ, партиските другари на Бата, претседателот на Социјалистичката партија Ивица Дачиќ. Мандатарот за нова српска влада не сакал ништо да коментира.
Пред шест години Бата Живојиновиќ преживеа срчев удар. Од инфарктот, срцето му е оштетено, крвните садови му се во лоша состојба и е дијабетичар. Боледуваше и од гангрена, која успешно ја излечи на Куба.