Генералниот секретар на ОН Бан Ки-мун во најновиот извештај за работата на УНМИК ги повикува косовските власти брзо да воспостават Специјален суд за воени злосторства и да ги зголемат напорите за обезбедува цврст консензус во однос на тоа прашање, јави Танјуг.
Бан го поздрави конституирањето на косовскиот парламент и формирањето нова влада во Приштина, нагласувајќи дека по воспоставувањето на основните институции, косовските власти сега треба повеќе да се насочат кон решавање на проблемите со кои се соочува Косово.
– Важен чекор за владата и парламентот би било брзо усвојување на закон за воспоставување на специјален суд за случаите што произлегуваат од заклучокот на специјалниот истражен тим на ЕУ, како што е договорено меѓу Косово и ЕУ, нагласува Бан во својот тримесечен извештај, објавен на страницата на ОН.
Тој ги повика косовските политички лидери да ги зголемат напорите со цел јакнење на разбирањето и консензусот во однос на тоа прашање, со оглед на неговото значење за иднината на Косово.
– Треба да се продолжи и со напорите за почитување на законот и продлабочување на вистинско долгорочно примирје меѓу заедниците на Косово, порача првиот човек на светската организација.
Бан ги повика Белград и Приштина што побрзо, во целост и посериозно да се ангажираат во дијалогот под посредство на ЕУ на ниво на лидери.
Генералниот секретар, исто така, изразува загриженост и за извештајот за растот на бројот на мигранти од Косово во изминатите месеци, и во тој контекст ги поздрави напорите на косовските власти да се посветат на решавање на тоа прашање. Тој, исто така, ги поздрави и брзите чекори што ЕУ ги презема во истрагата за наводите за корупција во ЕУЛЕКС.
– Важно е тие наводи да не се искористат за поткопување на значењето на улогата на ЕУЛЕКС на Косово, како и сите страни да продолжат во целост да соработуваат со мисијата, заклучи Бан.
Вкупната безбедноста ситуација за перидот на кој се однесува извештајот на Косово останува стабилна, иако е регистриран мал раст на бројот на инциденти во области со етнички мешано население.
Извештајот на ОН се однесува на периодот од 16 октомври 2014 до 15 јануари 2015 година, а објавен е во пресрет на седницата на Советот за безбедност на ОН што ќе биде одржана на 6 февруари, на кој документот ќе биде разгледан.