Анкетите во Грција покажуваат дека грчкиот премиер Андонис Самарас последните две недели пред изборите на 25 јануари не успева да ја намали предноста на неговиот главен противник, Алексис Ципрас од Сириза, јави дописникот на МИА од Атина.
Анкети на „Капа рисрч“ и „Алко“ покажуваат дека Сириза води пред партијата Нова демократија на Самарас со 2,6 и 3,2 процентни поени. Анкетата на „Капа“ за вчерашното издание на „То Вима“, која весникот ја објави на насловната страница под наслов „Можност на левицата“, покажува дека Сириза има 28,1 отсто поддршка, а Нова демократија 25,5 проценти.
– Има постојан тренд на водство на Сириза со мала предност во однос на Нова демократија, изјави Димитрис Сотиропулос, вонреден професор по политички науки на Универзитетот во Атина. Според него, насловот би можел да биде значаен, со оглед на тоа што медиумската група на која и припаѓа „То Вима“ досега е „млака околу изгледите за победа Сириза“.