Рускиот претседател Владимир Путин денеска на средбата со српскиот патријарх Порфириј во Москва оцени дека, како што рече, сојузничките односи меѓу Русија и Србија се најтопли и најблиски.
На средбата со српскиот патријарх во Кремљ, Путин рече дека очекува српскиот претседател Александар Вучиќ на 9 мај да ја посети Москва и да присуствува на прославата на 80-годишнината од победата во Големата патриотска војна.
На средбата, на која присуствуваше и патријархот московски и на цела Русија – Кирил, Путин рече дека Русија е свесна за тешката ситуација на Балканот.
„Знаеме дека ситуацијата на Балканот не е едноставна. И знаеме за вашите напори за зајакнување на позицијата на Србија“, рече Путин, обраќајќи му се на српскиот патријарх, пренесува РИА Новости.
Рускиот претседател Путин го истакна придонесот на Српската православна црква во односите меѓу народите на двете земји.
„Српската православна црква дава значаен придонес во зајакнувањето на односите меѓу народите на Русија и Србија“, рече Путин за време на средбата во Кремљ.
Патријархот Порфириј му подари на рускиот претседател Путин велигденско јајце со натпис „Христос воскресна“ на српски јазик.