Во Салон 19,19 вечер ќе биде промоворан новиот роман на Томислав Османли – „Зад аголот“, објавен од издавачката куќа „Магор“.
– Романот носи приказна во која се меша современоста и историјата, фантастиката и реалноста, длабејќи го наративот за парадоксалниот геометризам на изненадата што демне зад првиот свиок… „Зад аголот“ е монтажно, мултимедијално, филмски, на места и стриповски, ирониски, но и емпатиски, крајно возбудливо раскажан роман за играта на судбинското и за случајното; за љубовта и за предавството, за војната и за изневерата, за залудноста на занесните алтруистички проекти и за надвладувањето на егоизмот низ текот на вкупната човекова историја…, информира издавачот.
Томислав Османли (1956) е писател, сценарист, драматург, теоретичар на медиуми и есеист. Автор е на дваесетина книги проза, публицистика, драмски текстови, сценарија. Објавуван е и на англиски, француски, српски, руски, хрватски, полски, ладино (јудео-шпански), романски и на бугарски јазик. Член е на Друштвото на писателите на Македонија и на Македонскиот ПЕН центар.
Неговата нова книга ќе ја промовираат Јелена Лужина и Ферид Мухиќ. Промоцијата ќе биде збогатена со музички настап на Владимир Мартиновски.