Човекот кој влезе во „Гинисовата книга на рекорди“ како најнизок маж на светот, Тапа Магар, почина во петокот на 27 годишна возраст поради воспаление на белите дробови.
Магар е роден во Непал во 1992 година, а кога се родил бил со големина на дланка.
Со своите 67 сантиметри висина, тој беше најнискиот човек на планетата кој самиот може да се движи. Единствено понизок од него беше Џунри Белавинг од Филипините, кој го држеше рекордот на најнизок неподвижен маж на светот и беше седум сантиметри понизок од Магар. Тој беше врзан за постела поради болест на коските.
Во 2011 година Магар беше прогласен за амбасадор на добрата волја на Непал во сферата на туризмот. Тој пропатува десетици земји во светот и гостуваше на телевизии во Европа и во САД.
„Животот може да биде многу тежок кога сте тешки само шест килограми и не се вклопувате во свет прилагоден на личности со просечна висина“, пишуваше на веб-страницата на „Гинисовата книга на рекорди“.