Вакцината против свинскиот грип, поточно вирусот H1N1, има ризик „кој може да се толерира“ од нервно пореметување, познато како Гијен-Бареов синдром, утврдија американски експерти.
Се работи за автоимуно пореметување кое може да предизвика слабост на мускулите или привремена парализа.
Помеѓу 23 милиони американци кои се вакцинирани за време на епидемијата свински грип во 2009-та и 2010-та година, кај 77 луѓе во рок од три месеци по имунизацијата се појавил тој синдром, соопштила американската Национална канцеларија за вакцинација.
Експертите сметаат дека користа од вакцината е далеку поголема од ризикот, и додаваат дека и кај вакцини против обичен, сезонски грип веројатно се јавува истиот процент случаи на Гијен-Бареов синдром.
Во истражувањето објавено минатиот месец е утврдено дека вакцината против свинскиот грип за време на епидемијата спречила помеѓу 700 илјади и 1,5 милиони случаи на оваа болест и до 500 смртни случаи во САД.