Првата полуфинална вечер на 58-то натпреварување за најдобра песна во Европа во шведскиот град Малме им донесе пласман во финалето на претставниците од Молдавија, Литванија, Ирска, Естонија, Белорусија, Данска, Русија, Белгија, Украина и Холандија.
Босна и Херцеговина оваа година нема претставник на Евровизија, а жребот одлучи сите натпреварувачи од поранешна Југославија да настапат во истата вечер, освен Македонија која в четврток ќе биде претставена од Есма Реџепова и Влатко Лозановски.
Само уште Македонија, од земјите од поранешна Југославија, има шанси за настап во финалето во сабота на 18 мај.
Пред полуфиналето и на обложувалниците песните на овие земји лошо котираа, а фаворит на обложувалниците беше претставничката од Данска, Емили де Форест, која синоќа го оправда тој статус.
Гласањето оваа година се одвива на следниот начин: прво жирито од секоја земја рангира песни од прво до последно место, а потоа публиката гласа за своите фаворити. Со собирањето на тие гласови во однос 50%-50% се добива вкупниот збир гласови од таа држава.
Во финалето секоја година директно се пласираат претставниците од „петте големи“- Франција, Шпанија, Германија, Велика Британија и Италија, а со нив оваа година и Шведска, како домаќин и победник на минатогодишното натпреварување.