Новата евровизиска песна со која Есма Реџепова-Теодисиевска и Влатко Лозановски-Лозано ќе ја претставуваат Македонија на 58-то издание на изборот за Песна на Евровизија е насловена „Пред да се раздени“.
Композицијата е на Дарко Димитров, Лазар Цветковски и Магдалена Цветковска – Ена, која го напиша текстот, а за ромскиот дел од песната на Есма се погрижи нејзиниот син Симеон Атанасов.
„Пред да се раздени до мене остани, во новиот ден да сме заедно јас и ти…“ се дел од стиховите на новата песна.
Премиерната изведба ќе се случи утре вечерва, во 19 часот, во студио 1 на Македонската радио телевизија.
Песната ќе биде дел од снимањето на светски познатото шоу „Танц со ѕвездите“.
Изборот на Песна за Евровизија ќе се одржи во мај во Малме, Шведска.