Агресивен сом долг над 2 метри и тежок околу 90 килограми повреди најмалку пет пливачи на езерото Бромбах во јужната германска покраина Баварија, соопшти полицијата, додавајќи дека полицаецот на крајот морал да ја убие џиновската риба со своето службено оружје.
Инцидентите се случиле завчера доцна попладне во близина на пловечкиот остров, каде што џиновската риба се задржувала и постојано напаѓала луѓе во водата. Медицинскиот персонал на Црвениот крст ги третирал раните од каснување на пливачите на местото на настанот.
Бидејќи рибата не покажувала знаци на оддалечување и продолжила да претставува закана, локалната водна спасувачка служба ја повикала полицијата. Полицијата го опколила просторот за пливање за да спречи понатамошни инциденти.
Бидејќи рибата се сметала за опасност за пливачите, службите за итни случаи одлучиле да го убијат животното. Двајца рибари подоцна со брод извадиле сом тежок 90 килограми. Сомовите од оваа големина не се ретки во Германија и повремено предизвикувале тревога.
Пред повеќе од 20 години, џиновски сом со прекар „Куно убиецот“ привлече внимание од меѓународните медиуми откако беше објавено дека проголтал мало куче во германско езеро во близина на полската граница.