Тажна вест попладнево се рашири на социјалните мрежи. Почина македонската пејачка Небахат Бади Бекир.
Покрај соло кариерата, Бади понекогаш настапуваше со групата наречена „Четири грации“, каде покрај Бади беа и Благица Павловска, Адријана Алачки и Росана Тодоровска. Нарекувана е македонската Весна Змијанац.
По објавувањето на денешната тажна вест се огласи и Росана, која откри дека Бади боледувала од најтешката болест.
Првите чекори на сцената ги прави во детските денови како член на играорна група изучувајќи го во исто време и македонскиот и турскиот фолклор. Како дебитант на музичката сцена се појавува во 1985 година на фестивал на забавни мелодии.
Паралелно пее на турски, албански и македонски јазик.
Најплоден период на нејзината кариера е за време на големите југословенски турнеи. По распадот на Југославија и се посвети на македонската фолк песна.
Пријатели, колеги и обожаватели веќе се простуваат со неа на социјалните мрежи. Тења Додева напиша: „Мила, каде побрза и ти… Се гледавме често и навистина убави спомени имам со тебе. Почивај во мир, душо мила, ти благодарам за убавите песни.“