Ерик Дејн, актерот најпознат по своите улоги во „Вовед во анатомија“ и „Еуфорија“, почина на 53-годишна возраст, помалку од една година откако му беше дијагностицирана амиотрофична латерална склероза (АЛС). Дејн го играше семејниот патријарх Кал Џејкобс во хит тинејџерската драма на HBO „Еуфорија“, но стекна светска слава како д-р Марк Слоун во популарната медицинска драма „вовед во анатомија“.
На актерот роден во Калифорнија му беше дијагностицирана АЛС минатата година и ги помина последните неколку месеци подигајќи ја свеста за најчестата форма на болеста. „Со тешко срце објавуваме дека Ерик Дејн почина во четврток попладне по храбра битка со АЛС“, се вели во соопштението на неговото семејство.
Во соопштението се вели дека ги поминал последните денови опкружен со пријатели и неговата сопруга, актерката и модел Ребека Гејхарт, и нивните две ќерки, Били и Џорџија, кои беа „центарот на неговиот свет“.
„Длабоко ќе ни недостига. Ерик ги обожаваше своите обожаватели и беше вечно благодарен за љубовта и поддршката што ја добиваше“, соопшти семејството.
Дејн, исто така, го играше Џејсон Дин во фантастичната серија „The Charmed Ones“ и капетанот Том Чендлер во акционата драма „The Last Ship“, а се појави и во филмови како „Marley & Me“, „Valentine’s Day“ и „Burlesque“. Роден е во Сан Франциско во 1972 година, а своето телевизиско деби го имаше во 1993 година во серијата „The Wonder Years“.
АЛС, позната и како Лу Геригова болест, е ретка дегенеративна болест која предизвикува прогресивна мускулна парализа. Ги засега нервните клетки во мозокот и ‘рбетниот мозок кои го контролираат движењето, предизвикувајќи пациентите постепено да ја губат способноста сами да зборуваат, јадат, одат и дишат.
Минатото лето, Дејн изјави за емисијата „Good Morning America“ на ABC дека дијагнозата го „разбеснила“. „Знаете, го загубив татко ми кога бев мал“, рече тој. „И сега постои голема веројатност моите девојки да ме изгубат кога се уште многу млади.“
Голем број од неговите колешки од „Grey’s Anatomy“ му оддаваат почит на починатиот актер. Ким Рејвер, која ја играше неговата сопруга на екранот, рече: „За време на снимањето, тој имаше искра во очите и со палав израз на лицето, со совршен комичен тајминг, ќе кажеше реплика што ќе ве собори од нозе.“
Кевин Меккид, кој го игра трауматологот Овен Хант во серијата, објави на Инстаграм: „Почивај во мир, пријателе мој.“ Создавачот на „Еуфорија“, Сем Левинсон, изјави за Variety: „Скршен сум од загубата на нашиот драг пријател. Беше чест да соработувам со него. Да се биде негов пријател беше подарок.“