Концертот на Дино Мерлин во Краљево отвори нова полемика околу настапите на музичари во регионот, откако во Хрватска и Босна и Херцеговина претходно беа откажани или оспорувани настапи на српски изведувачи.
Босанско-херцеговскиот пејач Дино Мерлин треба да настапи на 5 септември на Спортскиот аеродром во Краљево, но неговиот концерт веќе наиде на организиран отпор.
Во Краљево за 26 август е најавен собир под мотото „Нема да пееш“, кој го организираат здруженија на воени инвалиди и други организации.
Организаторите бараат концертот да не се одржи и повикуваат граѓани да се приклучат на протестот, кој го најавуваат како голем патриотски собир.
Овој случај доаѓа по низа слични ситуации во регионот во кои националните и политичките тензии се прелеваат и врз музичките настани, односно откако Хрватска и Босна и Херцеговина откажуваа концерти на српски пејачи.
Во Хрватска во 2023 година беше откажан настапот на Јелена Карлеуша на Барбаринац, а по реакциите и притисоците беа откажани и настапите на Аца Лукас и Харис Џиновиќ. Беа откажани и концерти на Ана Бекута но и многу други пејачи.
Случајот предизвика реакции во јавноста бидејќи концертите беа откажани во период кога во Хрватска се зголеми притисокот од дел од ветеранските и други здруженија против настапите на одредени српски изведувачи.
Слични реакции имаше и во Босна и Херцеговина. Во 2026 година беше откажан најавениот настап на Јелена Карлеуша во Сараево по политички реакции поврзани со нејзините јавни настапи и изјави.
Во текот на летото во БиХ беа откажани и неколку концерти на српски изведувачи, по реакции поврзани со нивните настапи во Србија.
Сега сличен модел се појавува и во Србија, но овојпат на мета е музичар од Босна и Херцеговина.
Организаторите на протестот во Краљево велат дека сакаат да испратат порака против одржувањето на концертот и бараат властите да реагираат.
Случајот повторно го отвора прашањето дали музиката во регионот може да остане надвор од политичките и националните поделби што продолжуваат да ги оптоваруваат односите меѓу соседните земји.
Додека едни во концертите гледаат само културни и музички настани, други ги поврзуваат настапите на одредени изведувачи со нивните ставови, изјави или однесување за време на воените конфликти во деведесеттите години.
Концертот на Дино Мерлин во Краљево сега се најде во центарот на новата регионална полемика, а останува да се види дали најавениот протест ќе доведе до промена на плановите за неговиот настап.