Стотина првачиња од основното училиште „Ѓорѓија Пулевски“ во општина Аеродром, денеска посреќни ќе си заминат дома, откако на подарок добија новогодишно пакетче од сино-белиот Дедо Мраз, кој овој пат во „мисија“ ги испрати своите „помошници“ од таборот на МЗТ Скопје Аеродром.
Во склоп на својата општествено-одговорна мисија и желба за директен контакт со локалната заедница, а во соработка со претставниците на општина Аеродром, македонскиот кошаркарски шампион реши да издвои дел од своите средства за да израдува дел од најмладите. Гестот е можеби симболичен, но е од срце, како што велат од МЗТ Скопје, бидејќи ништо не може да го замени задоволството кога ќе се слушнат детските насмевки и нивното искрено „благодарам“ за направеното изненадување.
Подароците на сите најмали во едно од основните училишта кои гравитираат во нашата општина ги поделија капитенот Дамјан Стојановски, заедно со репрезентативните и клупски колеги Андреј Магдевски и Андреј Маслинко, како и со извршниот директор на клубот, Тони Грнчаров, а во друштво на директорот на образовната установа, Марјан Јовановски, информираат од кошаркарскиот клуб.
Дружбата со првачињата донесе големи насмевки и на нивните лица, а поздравите и прегратките од нивните најмали обожаватели им носат и дополнителен мотив за уште посериозна работа, труд, но и промоција на спортските вредности, велат од МЗТ Скопје.
Од таму се надеваат дека следната година ќе успеат да опфатат уште повеќе училишта, а со тоа да израдуваат повеќе деца.