Изложбата на слики и икони од меѓународната ликовна колонија „Македонска икона 2012“ вечер ќе биде отворена во Центарот за култура „Трајко Прокопиев“ во Куманово.
Оваа ликовната колонија на македонската сцена постои пет години и досега во својата работа има вклучено повеќе ликовни уметници од Македонија и од регионот. Идејата на колонијата е промоција на македонската икона преку создавање нови икони. Сите активности, финансиски и организациски, со оваа колонија се повразни со Здружението на граѓани „Коледари“ од Куманово, со координација на уметничкиот директор на колонијата Мирослав Трендафиловски – Мики.
Кумановската публика ќе може да погледне по неколку дела од Васко Ташковски, Трајан Трајковски, Александар Стефановски и Мики Трендафиловски од Македонија, Радојка Самарџија, Биљана Новковиќ и Весна Антониќ од Србија, Михаела Гаџева и Марија Евтимова од Бугарија.
Изложбата ќе биде поставена до 24 јануари, а потоа ќе биде презентирана и во неколку позначајни галериски центри низ државата.