Светот стана помалку мирен од минатата година, а бројот на активни конфликти сега е поголем од кое било време по Втората светска војна, според најновиот Глобален индекс на мирот, според кој Исланд е сè уште најбезбедната или најмирната земја во светот.
Според индексот составен од Институтот за економија и мир, целокупното ниво на мир се влоши во 99 земји.
– Иако имавме овој катастрофален пад, тој навистина не влијаеше на земјите на врвот – рече Стив Килелеа, основач и извршен претседател на Институтот за економија и мир, кој го воспостави индексот во 2007 година.
Глобалниот индекс на мир рангира 163 земји според 23 индикатори, вклучувајќи воени трошоци, активни конфликти, стапки на убиства и перцепции за безбедност.
Највисоко рангираните земји обично имаат ниско ниво на насилство, функционални институции, висок степен на социјална доверба, добри односи со соседите и висок квалитет на живот, пишува Би-Би-Си.
Исланд е на врвот на индексот од 2008 година и го задржува статусот на најмирна земја во светот 19-та година по ред.
Меѓу десетте најмирни земји во светот, по Исланд, се Нов Зеланд, Швајцарија, Словенија, Ирска, Австрија, Португалија, Сингапур, Финска и Јапонија.
Глобалниот индекс на мир покажува дека, иако безбедносната состојба во светот продолжува да се влошува, земјите со висока социјална доверба, стабилни институции, ниска милитаризација и силно чувство на заедништво успеваат да зачуваат високо ниво на мир и стабилност.