Едно меѓународно истражување, кое го спровеле австралиски научници, идентификувало ген кој е поврзан со честите облици на епилепсија, што може да доведе до рано дијагностицирање на болеста.
Шефот на истражувачкиот тим Ингрид Шефер од Универзитетот во Мелбурн истакнува дека научниците од претходно имаат откриено одреден број гени поврзани со епилепсијата, но тие биле карактеристични за ретки семејства каде голем број членови страдаат од оваа болест.
Специфичноста на генот, кој го идентификувал австралискиот тим, е во тоа што веројатно е карактеристичен токму за оние епилептичари, кај кои не постои семејна историја на ова заболување.
Овој ген е значаен за болните од т.н. фокална (парцијална) епилепсија, која напаѓа само еден дел од мозокот и влијае на дел од телото кој тој го контролира.
Освен австралиски, во ова истражување учествувале и европски и канадски научници, а меѓу испитаниците имало Австралијанци, Шпанци, Италијанци и Израелци.